Oqaluttuassartaa Siunertaalu

Kalaallit Nunaata juullip nipitittagaanik Dorthe Hertlingimit isumassarsiarineqarsimavoq. Poul Madsen peqatigalugu eqqumiitsuliortoq Jens Rosing attavigisimavaa juullip nipitittagaalu siulleq titartartillugu 1974-imi saqqummersinneqartoq. Nipitittagaq taanna amerlanerit nalunngilaat; Tuttu Asaluusat kiisalu Qaasuitsup Ulloriaa ullumikkut Juullip Nipitittagaata Aningaasaateqarfiata ilisarnaartigaa. Taamanikkut Dorthe Hertlingip siornagut kalaallit nunaannut ministeriusimasoq Knud Hertling uigaa. Taamanikkullu Poul Madsen Hellerupimi kalaallit illuanni pisortaavoq –  Kalaallit Nunaannik asannilluartutut ilisimaneqarluartoq kalaallillu eqqumiitsuliaannik katersisimasoq, kingornalu Kalaallit Nunaanni katersugaasivinnut utertinneqarlutik.

Aningaasaateqarfik kalaallit kulturiat iluaquserniarlugu atulersinneqarpoq. Aningaasaateqarfiup isertitai kalaallit kulturikkut suliniutaannut imaluunniit/aamma kalaallit eqqumiitsuliaannut sanalugaannullu atorneqartussaapput. Uani takukkit ukiut ingerlanerini suut juullip nipitittagaata aningaasaateqarfiata tapertarsimasai.

Juullip Nipitittagaanik saqqummiineq  oktobarimi/novembarimi Nuummi Københavnimilu piuaannarpoq. Aningaasaateqarfiup illersuisua kunngikkormiutut ataqqinassusilik Kunngissaq Frederik pisinnaatilluni peqataasarpoq. Nuummi saqqummiineq ilaatigut inuutissarsiortunik qaaqqusanut aammalumi inissaqartillugu innuttaasut soqutiginnittut peqatigalugit pisarpoq. Københavnimi saqqummiineq inunnut qaaqqusanut 100-t missaaniittunut pisarpoq. taassumalu saniatigut tusagassiortualuit najuuttarput. Saqqummiineq kalaallit ileqquattut kaffisortitsinertut ingerlanneqartarpoq, kalaallit kaagiannik tamussiussasaqartarluni, kalaallinik erinarsortoqarluni kiisalu qaaqqusamik oqalugiartoqarluni. Ualeq nuannersoq takorniuunnertalik nipitittakkamillu nutaamik takutitsiffiusoq. Saqqummiinerup kinguninngua Juullip Nipitittagaa Kalaallit Nunaanni Danmarkimilu tuniniaavinni ammarneqartarpoq.

Siornatigut Kalaallit Nunaata Juullip Nipitittagaata Aningaasaateqarfia ateqarsimavoq Kalaallit Nunaanni Juullip Nipitittagaata Aningaasaateqarfia

Print Friendly, PDF & Email