Aningaasaateqarfik pillugu

Kalaallit Nunaata Julemærkianik isumassarsisoq tassaavoq Dorthe Hertlingiugaluaq, Kalaallit Nunaannut ministeriusimasup Knud Hertlingiulagaluup nulia. Poul Madseniugaluaq peqatigalugu (Kalaallit Illuutaanni Helleruppimiittumi ittuusimasoq – aamma Kalaallit Nunaannik asannilluartutut ilisimaneqarluartoq kalaallillu eqqumiitsuliaannik katersisimasoq, taassumalu toqunerata kingorna Kalaallit Nunaanni katersugaasivinnut tunissutaasimallutik) Jens Rosingiugaluaq siullerpaatut titartaatissimavaat, taanna 1974-mi saqqummersinneqarpoq. Amerlanerit nipitittagaq taanna nalugunanngilaat. Tuttu Asaluusat kiisalu Qaasuitsup Ulloriaa ullumikkut Juullip Nipitittagaata Aningaasaateqarfiata ilisarnaartigaat.

Aningaasaateqarfik 1974-imi kalaallit kulturiat iluaquserniarlugu atulersinneqarpoq. Aningaasaateqarfiup isertitai kalaallit kulturikkut suliniutaannut imaluunniit/aamma kalaallit eqqumiitsuliaannut sanalugaannullu atorneqartussaapput.

Juullip Nipitittagaata Aningaasaateqarfiani siulersuisut piumassusertik atorlugu Nuummi kiisalu ataatsimiititat Qallunaat Nunaanni sulipput. Nuummi siulersuisut Juullip Nipitittagassaanik titartaasitsilluni unammisitsineq toqqaanerluunniit suliassaasa pingaarnersaraat.

Nuummi siulersuisut Aningaasaateqarfiup pii aqutaraattaaq. Peqatigiiffiit, eqqumiitsuliortut inuillu kalaallit kulturianni iluaqutaasut Aningaasaateqarfimmiit tunisarpaat.

Ataatsimiititat Juullip Nipitittagassaa toqqarneqareeraangat teknikkikkut  naqiteriaannanngorlugu suliareqqinnera  Naqiterisarfik  Rosendahl Schultz Grafisk suleqatigalugu naammassiniartarpaat. Ullorlu naqiterinermik aallartitsineq ulluusarpoq pingaartorsiorfik, tassami nalujunnaartarparput ulloq saqqummersitsinissaq qallisoq.

Juullip Nipitittagaa oktoberimi pingasunngorneq kingulleq Nuummi piuaannarpoq, Københavnimilu oktoberimi sisamanngorneq kingulleq piuaannarluni.

Saqqummiineq inunnut qaaqqusanut 100-t missaanniittunut pisarpoq; qaaqqusanilu Ataqqinartorsuaq kunngissaq Frederik pisinnaatilluni peqataasarpoq, taassumalu saniatigut tusagassiortualuit peqataasarlutik.

Saqqumiineq kalaallit ileqquat atorlugu kaffisortitsinertut ingerlatinneqartarpoq, kalaallit kaagiannik tamussiussaqartarluni, kalaallinik erinarsortoqarluni kiisalu qaaqqusamik oqalugiartoqarluni. Ualeq takkorniunnermik ilalik Nipitittakkamillu nutaamik takutitsiffiusoq nuannisaarfiusarpoq.

Saqqummiinerup kinguninngua Juullip Nipitittagaa Kalaallit Nunaanni Qallunaat Nunaannilu tuniniaavinni ammaarneqartarpoq.

Print Friendly, PDF & Email