Juullip Nipitittagaata Aningaasaateqarfiata eqqumiitsuliortutut ilisimaneqartoq Malînánguak´ M.Mølgaard 2012-mi Juullip Nipitittagaanik 39-ssaanik saqqummersumik ajugaatippaa.

Malînànguak´ M. Mølgaard:
Malînànguak´ M. Mølgaard 1960-mi Qullissani inunngorpoq.

Malînànguak´ M. Mølgaard Nuummi HF-erami ilusilersuineq immikkut toqqakkatut Astrid Heilmann ilinniartitsisoralugu sammisimavaa.

Malînànguak´ M. Mølgaard 1985-imi tusagassiortunngorpoq. Piffissani 1982-93, 1995-96, 2010-11 KNR radiomi tv-milu tusagassiortutut atorfeqarpoq kiisalu 2002-2010 Tele Greenland A/S-imi tusagassiisartut pisortaattut atorfeqarluni.

Qalipakkanik saqqummersitsineri:
Aasivik 1984, Nuummi Eqqumiitsulianik Katersugaasivik 2007, Nuuk Rådhus 2008, Tele-Postimi sutortarfik 2007-2010, Grønlandsbanken 2010, Neriniartarfik Nipisa 2010-2011, Naasuerniarfimmi 2011, Galleri Malînánguak´, junip 1-iani 2011-mi atulersumi, Kalaallit Nunaata kulturikkut illorsuani Katuami 2012. Allarpassuarnillu suliaqarluni.

 

Malînànguak´ M. Mølgaard Juullip Nipitittagaanut qalipakkaminut imatut oqaasertaliivoq:
”Juullip unnuaani ’Issittup qitornai’ nikorfapput tasiorlutik, neriunnermik peqarlutik, ataatsimoorlutik nunaminnik kivitseqatigiinniarlutik neriorsueqatigiillutillusooq.

Juullip ulloriaa neriuummik asanninnermillu tunisisoq isigaat – arsarnerillu nukissamik aallerfigaat, siuaasat anersaavat nukittooq piumassuseqalersitsisorlu ataqqillugu qujaniarfigaat. Nunaminni suminngaanneerfitsik ataqqivaat, taamaammallu assuutitik kinaanerminnik ilisarnaatigisatik atorpaat. Angutit tikiussaat puisit nannullu – arnallu uniffeqaratik kusanartuliorusussusillit, ulu, ujaloq meqqutinnguillu atorlugit pilersissimavaat.

Nunaga inuilu asavakka, inuusuttut neriuuteqarfigalugit tulluusimaarutigalugillu.

Print Friendly, PDF & Email