Juullip Nipitittagaata Aningaasaateqarfiata eqqumiitsuliortoq Lisbeth Karline Poulsen 2013-mi Juullip Nipitittagaanik normu 40-nngortorsiorlugit saqqummersumik titartaaneranik ajugaatippaa.

2013Lisbeth Karline Poulsen:

Lisbeth Karline PoulsenLisbeth Karline Poulsen, Nanortalimmi inunngorpoq, qallunaat nunaanni, Uummannamilu peroriartorluni.
Lisbeth Karline mikisuullunili titartaasarpoq, tallimanik ukioqarluni linoleummimik kigartukkaminik assilialiaateqarpoq. Meeqqat atuarfianni efterskoleramilu ilusilersuineq nuannariuaannarsimavaa. Aasiannilumi GUmi assilialiorneq toqqarsimallugu. Nuummi eqqumiitsuliornermik atuarfimmiippoq 2003-mit 2004-mut. Århus Kunstakademimilu 2005-imit 2009-mut ilinniarpoq.
Lisbeth Karlinep kissaatigiuaannarsimavaa arlaani Juullip Nipitittagaa suliariumaarlugu. Ukiut marluk matuma siona Danmarkimiit nunatsinnut uteqqippoq, imannallu allalluni:
“Kalaallit juullertarnerat tassaana nuannersoq, apisimalluni taarluni juullip ulloriarpassui igalaani takussaasut. Juulleriartortoq angerlartillunga takuara meeraq qamutinik uniartittoq. Eqqaavakka meeraaninni qamutertarnikka pilluarnartut. Puigorsinnaanngilaralu aqqalussama kiinaa, tunissutisiani qamutit puuiarmagit”.
Lisbeth Karlinep eqqaavaa inersimasunngorluni meeraanermi qamutertarnernit misigisat qaffakaatillugit nuannersut ilagigaat, meeraqatillu qattorngit sisorarfissaqqissut sisorarfigalugit, imaluunniit qasulluni angerlamut uniartilluni orpilissalluunnit qamutinut qilerlugit uniarneqartut.
Lisbeth Karlinep titartakkani qalipaatinillu toqqaanini qiimanartuutinniarsimavaa. Neriuutigaa suliani qungujunnermik juullerpalaarnermillu atuisussanut misigititsissasut. Neriuutigaalu nuannarisaminik pissanganartitaminillu suliaqartuarnissani, inuunerminilu nuannaarnissani isumassarsiortuarnissanilu kissaatigiginittaaq.

Print Friendly, PDF & Email