Andala & Co. Paasisassarsioqqippoq – tamatumuuna Juullip nipitittagaa-nut 2016-mut tunngasumik. Eqqumiitsuliortoq tassaavoq Nuka K. Godtfredsen.

Nuka K. Godtfredsen (Inuusoq 1970) Kalaallit Nunaata kujataani Narsami inunngorpoq tassanilu peroriartorluni, Nuka meeraanerminiilli titartaasarlunilu qalipaasarpoq. Nunap anaanaminit ningiuata qatanngutaa Johan Markussen (1906-1994) eqqumiitsuliortuuvoq, eqqumiitsuliaat meerarpaluttumik qalipaariaaseqarluni suliaasarput. Nukallu taanna suliaminut isumassarsiorfittut atortarpaa.

Nuka eqqumiitsuliortutut ilinniarsimasuunngilaq, taamaattorli suleriaatsimini nutaajunaniluunniit misilittagaqanngitsutut taaneqarsinnaanani. Akerlianik ilisimaneqarluarpoq suliaalu Kalaallit Nunaanni pingaartinneqaqaat. Ukioq mannalu tulluusimaarutigaarput juullip nipitittagaa 2016 suliarimmagu.

Siullermiinngilaq juullip nipitittagaliortuni aqissip assitaritinneqarnera. Tassami Jens Rosing-ip (1925-2008) aqisseq qilammi ullorialimmi juullip nipitittagaanut assitaliutereernikuuaa taanna kingornatigut Juullip Nipitittagaata aningaasaateqarfiata ilisarnaataatut atulerpoq. 2011-mi aqissit aputitut qaqqorissut juullip nipitittagaani assitaliunneqaqqipput Kistat Lundimit (1944-2017) suliarineqartoq. 2016-imi titartakkat nangeqattaartut Sapiitsuliortuunngitsoq Andala – maanna juulimaajulluni, aqissinik nammappooq. Andala ikiortinilu piniariarsimapput juullisiutissanik, taakku puumi nammappai ilaquttanut ikinngutinullu agguaassassat. Juullingajalerpoq, aqissillu juullisiutigineqassapput. Nuka K. Godtfredsenip Andalamik assiliartaliinermigut kalaallit juullisioriaasiat takutippaa. Juullimimi tunissutisiassat pitsaanerpaat tassaapput kalaalimerngit.

Nuka K. Godtfredsen oqaluttuallammassuuvoq. Qalipagaami Kalaallit Nunaannimi ulluinnarni inuunerup immikkoortualuttuarai ilanngullugit titartartarpai. Inuit akornanni ilisarisimaneqaatigillualerpaa titartakkanik oqaluttualiat Andala 1997-2001 suliarisaleramigit, taakku aviisimi Sermitsiami aammalut atuaganngorlutik saqummertalermata.Tullissaanik ilisimaneqaatigillualerpai Qallunaat Nunaanni Katersugaasivissuarmi, Kalaallit Nunaata oqaluttuarisaanera 2007-mi aallarnersumik titartagartalersuiffigileramiuk, taakku nangeqattaartunngorlutik saqqummerput. Saqqummersut tulleriinneri tassaallutik “Oqaluttuaq – Fortællinger” nangeqattaartut sisamanik immikkoortortallit saqqummertoq siulleq taaguuteqarluni “Tutineq siulleq” 2010 saqqummerpoq. Tullia “Ukaliatsiaq” pingajuallu “Tunissut” saqqummerput maannalu saqqummiunneqartussap sisamaat suliaraat. Nangeqattaartut maanna oqaatsinut arlalinnut nutserneqarsimalerput, ilaatigut japanimiusut, taamaalilluni nunani allani aamma Nukap ilisarisimaneqaatigilissutigisaanik.
Nuka K. Godtfredsenip titartagaani tamani immikkuualuttuaqqat titartarluarneqarsimasut takuneqarsinnaajuarput. Soorlu juullip nipitittagaliaani taamaattoq. Juulimaap kavaajaata sinaakkutai aqissillu suluisa meqqui allalersornerisigut titartarluarneqarsimaneri anersaartornerisigullu ersersinneqarpoq silaannaq issittoq. Immikkuullarissutut takutinneqarujoq juulimaap qamippai – taakkuuppummi piniartumut atussallugit tulluarnerpaat.

Print Friendly, PDF & Email